Keleier an Naoned.

• ADAOZET E VO AR BLASENN FELIX FOURNIER.

Nepell diouzh plasenn ar Rouaned emañ ar blasenn Felix Fournier. E–pad eizh miz e vo labourioù adaozañ eno, evit sachañ an dud o pourmen e–harz ar benniliz Sant–Nikolaz. E–kreiz al leurgêr e vo lakaet mein a–liv gant skalieroù an iliz. Tro–dro e vo maen–greun louet–gell, hañval ouzh an hini kempennet plasenn ar Rouaned gantañ. Ouzhpennet e vo bankoù, ur wezenn hag ur bleuñveg, ha peadra da stagañ marc'hoù–houarn ivez. «Ne vo ket aes e–pad al labourioù, met ur c'heloù mat an hini eo. Ar blasenn zo danvez enni, met defot bezañ adaozet e tremen ar gerzherien e–biou dezhi» eme Jakez Pean a zo ar stal Radigois war e anv.

• 80 VLOAZ EO MARC'HAD TALENSAC

Ar marc'had dindan doenn nemetañ eo e Naoned. Abaoe miz Genver 1937 ez eus aozet ur marc'had e Talensac, e–lec'h ma oa al lazhdioù gwechall. E–tro 6.000 a dud a ya di da brenañ boued bep sizhun, eus ar Meurzh d'ar Sul. Gouez d'ar varc'hadourien o defe cheñchet boazioù Naonediz. E–pad ar sizhun e vez gwelet tud war o leve dreist–holl. Ar re o labourat a vez gwelloc'h ganto gortoz ar Sadorn hag ar Sul. Ral e vez dezho ober o frenadennoù a–raok o devezhiad labour.

• HARZ–LABOUR ER BN

E–mesk koshañ ha brudetañ embregerezhioù ar vro emañ ar BN. E Gwerzhav emañ he labouradeg bremañ, ha 422 den zo o labourat enni. D'ar Yaou 19 o doa goulennet an holl sindikadoù diganto ober harz–labour e–pad un eur. Int a fell dezho gouzout petra emañ an embregerezh turk Yildiz e soñj d'ober gant o uzin. Abaoe mizioù ez eus brudoù o redek, ha meur a wech e oa bet gweladennet Gwispiderezh an Naoned gant danvez prenerien. Nac'h a ra an Durked klask en em zizober diouti; hogen n'eus ket pell e oa bet gwerzhet ganto an uzinoù Delacre, e–lec'h ma oa produet lod gwispid BN. 20.000 tonennad a wispid a ya e–maez labouradeg Gwerzhav bep bloaz, met an hanter muioc'h a c'hallfe bezañ kenderc'het eno.

• DISKARET AR PRIZON KOZH

160 lojeiz, ur parklec'h publik, ur vagouri, takadoù glas, hag ur c'hoariva zoken. Bremañ eo sklaeroc'h an traoù: gouzout a reer dre ar munud petra a vo savet e–lec'h an toull–bac'h kozh, e–kichen Ti Keltiek. Abaoe 2012 eo serr ar prizon–se. Diskaret e vo e holl vogerioù, war–bouez ar porched mont e–barzh ha ti ar gref e–lec'h ma vo staliet Ar Gomedienn, un adc'hoariva 250 plas ennañ meret gant kompagnunezh ar «Cafe–Théâtre». E lec'h all e vo savet ranndioù, 70m² o ment peurliesañ. An hanter anezho a vo bevennet o feurm, hag un nebeud a vo miret evit tud war o leve. E–kreiz ar savadurioù nevez e vo ul liorzh–kêr digor d'an neb a gar e–pad an deiz. Plantoù ha liorzhoù e–leizh a vo tro–dro, war leurennoù ha toennoù an tiez. Ac'hann da 2020 e tlefe ar chanter bezañ peurachu.

——— GERIAOUEG ———

AC'HANN DA (d'ici à)

AR BLEUÑVEG (le parterre)

DANVEZ X (potentiel X, aspirant X)

DISKAR (abattre, renverser)

E–HARZ (au pied de)

GOUEZ DA = HERVEZ

GWERZHAV (Vertou)

AR GWISPID (les biscuits)

KENDERC'HIÑ = PRODUIÑ

AL LAZHDI (l'abattoir)

LOUET–GELL (beige)

MAGOURI*, AR VAGOURI (la crèche)

MERAÑ (gérer)

PENNILIZ*, AR BENNILIZ (la basilique)